ENG 
РУС
O'Z
20-23 oktabr kunlari Uzbekistan Airways Marketing va tashuvlar sotuvi departamenti ekspertlari Frankfurt-Mayn shahrida bo‘lib o‘tgan global aviatsiya sanoatining eng muhim voqealaridan biri – Routes World 2026 xalqaro forumida ishtirok etdilar.
Routes World an’anaviy ravishda aviatashuvchilar, eng yirik aeroportlar va turizm sanoati yetakchilari o‘rtasidagi professional muloqot uchun yetakchi platforma bo‘lib xizmat qiladi. Bu yilgi forumda istiqbolli yo‘nalishlarni ochish, mavjud aviaqatnovlar sonini ko‘paytirish, shuningdek, tranzit salohiyatini maksimal darajada oshirish va madaniyatlararo ishbilarmonlik hamkorligini mustahkamlash masalalari diqqat markazida bo‘ldi.
Uzbekistan Airways uchun Frankfurtdagi platforma xalqaro aloqalarni kengaytirishning samarali vositasiga aylandi. Ishbilarmonlik dasturining bir qismi sifatida jamoamiz Yevropa, Osiyo, Yaqin Sharq, Shimoliy Amerika va Okeaniyadagi aeroportlar va aviatsiya operatorlari vakillari bilan bir qator strategik muzokaralar o‘tkazdi. Ko‘p tomonlama muloqotning asosiy mavzusi yangi o‘sish nuqtalarini topish va milliy aviatashuvchining parvozlar geografiyasini yanada kengaytirish imkoniyatlarini batafsil ishlab chiqish bo‘ldi.
Bunday darajadagi tadbirlarda ishtirok etish jahon bozorida raqobatbardoshlikni oshirish bo‘yicha strategiyamizning ajralmas qismidir. Uzbekistan Airways yo‘lovchilarga butun dunyo bo‘ylab yanada qulay yo‘nalishlar, xavfsiz parvozlar va qulay tutashuvlarni taklif qilish uchun ishonchli hamkorliklarni yo‘lga qo‘yib, global aviatsiya makoniga faol integratsiyalashuvni davom ettirmoqda. Uzbekistan Airways bilan har qanday samo kengliklarida o‘zingizni uydagidek his qilasiz!
Download PDF