ENG 
РУС
O'Z
Uzbekistan Airways O‘quv-mashg‘ulot markazida O‘zbekiston Respublikasi davlat mustaqilligining 35 yilligiga bag‘ishlangan “Taraqqiyotning 35 yili: islohotlar natijalari va yangi marralar” mavzusida keng ko‘lamli seminar bo‘lib o‘tdi. Tadbir aviakompaniyaning barcha tarkibiy bo‘linmalari xodimlari – professionallar jamoasini birlashtirdi.
Uchrashuvga faxriy mehmon sifatida Respublika Ma’naviyat va ma’rifat markazi vakillari: tarix fanlari doktori, dotsent Farhod Ochilov hamda bo‘lim boshlig‘i, sotsiologiya fanlari bo‘yicha falsafa doktori (PhD) Suhrob Xidirov taklif etildi.
Davlat madhiyasi tantanali ravishda ijro etilgandan so‘ng Farhod Ochilov so‘zga chiqdi. U o‘z nutqida O‘zbekiston mustaqillik yillarida erishgan fundamental qadriyatlar va yutuqlarni alohida ta’kidladi. Bugungi voqelik – bu bilimli, tashabbuskor va maqsad sari intiluvchan yoshlar, onalik va bolalikni ishonchli ijtimoiy himoya qilish, jadal rivojlanayotgan iqtisodiyotdir. Mintaqada tinchlik, barqarorlikni ta’minlash va yaxshi qo‘shnichilik munosabatlarini mustahkamlashga – har birimiz asrab-avaylashimiz va rivojlantishimiz kerak bo‘lgan yutuqlarga alohida e’tibor qaratildi.
Suhrob Xidirovning Prezident Shavkat Mirziyoyev tomonidan mustaqillikning 35 yilligiga bag‘ishlangan tantanali marosimda belgilab berilgan yettita milliy dasturning mazmun-mohiyati va strategik ahamiyatini batafsil ochib bergan chiqishi tinglovchilarda qizg‘in munosabat uyg‘otdi. “Ta’lim va kelajak kasblari’, “Salomatlik va uzoq umr ko‘rish”, “Yuqori texnologiyali iqtisodiyot”, “Suv, ekologiya va yashil hududlar’, “Sudlar mustaqilligi va qonun ustuvorligi”, “Mahalla – taraqqiyotning “asosiy buyurtmachisi” hamda “O‘zbekistonning tinchlik va do‘stlik mamlakati sifatidagi nufuzini oshirish” dasturlari yagona maqsad – inson qadri, sha’ni va qimmatini ulug‘lashga xizmat qiladi. Notiq ushbu g‘oyalarni ro‘yobga chiqarish uchun har bir fuqaroning faol va ongli ishtiroki talab etilishini ta’kidladi.
“O‘quv-mashg‘ulot markazi” MChJ direktori o‘rinbosari Dildora Xasanova jamoa nomidan mehmonlarga minnatdorchilik bildirdi:
“Biz ushbu milliy dasturlarning mazmun-mohiyati va ahamiyatini chuqur ochib berganingiz uchun samimiy minnatdormiz. Bunday ma’rifiy tadbirlar fuqarolik pozitsiyamizni mustahkamlashda muhim ahamiyat kasb etadi va O‘zbekistonning kelgusi bunyodkorlik taraqqiyotiga xizmat qiladi”.
Seminar davomida ishtirokchilarga mamlakatimizning mustaqillik yillarida bosib o‘tgan ulkan yo‘li va aholi hayotining sifat jihatidan yaxshilanganini yaqqol ko‘rsatib beruvchi videoroliklar namoyish etildi. Uchrashuv yakunida muhokamalar jarayonida faollik ko‘rsatgan eng ilg‘or xodimlarga esdalik kitoblar topshirildi.
Uzbekistan Airways o‘z ishiga va mamlakat kelajagiga sodiq mutaxassislarni birlashtirib, Yangi O‘zbekistonning ajralmas qismi ekanligidan faxrlanadi!
Download PDF