Uzbekistan Airways xodimlari Zaamin Ultra xalqaro marafoni trassalarini zabt etishdi

“Uzbekistan Airways” AJ jamoasi mamlakatning eng yirik va nufuzli sport tadbirlaridan biri – Zaamin Ultra xalqaro tog‘ ultramarafonida faol ishtirok etdi. An’anaviy yugurish musobaqasi yana bir bor butun dunyodan sport ixlosmandlari va professionallarni birlashtirdi, aviakompaniyamiz vakillari esa eng murakkab masofalarni munosib bosib o‘tib, ajoyib jismoniy tayyorgarlik, chidamlilik va g‘alabaga bo‘lgan temir irodani namoyish etdilar.

50 kilometrlik ekstremal masofada aviakompaniya nomidan Alisher Rajabov, Ibrohimbek Niyozbekov va Hojiakbar Mahmudov ishtirok etdi. Murakkab tog‘li relef va balandlik o‘zgarishlari sportchilarimiz uchun to‘siq bo‘lmadi: ular marraga muvaffaqiyatli yetib kelishdi va sovrinli o‘rinlarni egallab, yuqori darajadagi tayyorgarlik hamda jamoaviy ruhning kuchini yana bir bor tasdiqladilar.

10 kilometrga yugurishda Olga Morozova ajoyib natija ko‘rsatdi. U marshrutni ishonch bilan bosib o‘tdi va o‘z masofasidagi barcha ishtirokchilar orasida mutlaq hisobda faxrli 4-o‘rinni egalladi. O‘z navbatida, Rufina Saifiullina va Feruza Saidxodjayeva 5 kilometrlik masofani muvaffaqiyatli bosib o‘tib, o‘zlarining faol ishtiroki va sog‘lom turmush tarziga intilishlari bilan hamkasblarini qo‘llab-quvvatladilar.

Bunday keng ko‘lamli loyihalarda ishtirok etish Uzbekistan Airways xodimlarining nafaqat o‘z ishining professionallari, balki butun jamoaga ajoyib namuna ko‘rsatuvchi intiluvchan insonlar ekanligini isbotlaydi. Hamkasblarimizni Zaamin Ultra’dagi ajoyib chiqishlari bilan samimiy tabriklaymiz va ularga ham sportda, ham professional faoliyatda yangi cho‘qqilarni zabt etishlarini tilaymiz!