Uzbekistan Airways xodimlari Ohangaron tumanidagi ekologik hasharda ishtirok etishdi

Joriy yilning 13 va 14-iyun kunlari Toshkent viloyatining Ohangaron tumanidagi "Transportchilar bog‘i" hududida mamlakatimiz transport sohasi vakillarini birlashtirgan keng ko‘lamli ekologik hashar o‘tkazildi. Obodonlashtirish ishlarida "Uzbekistan Airways" AJ xodimlari ham faol ishtirok etishdi. Tadbir O‘zbekiston Respublikasi Prezidenti va Transport vazirligi tomonidan "O‘zbekiston - 2030" strategiyasini amalga oshirish va "Yashil makon" umummilliy loyihasini kengaytirish doirasida berilgan topshiriqlar ijrosi doirasida tashkil etildi.

Ikki kunlik ekologik aksiya davomida aviakompaniya xodimlari soha hamkasblari bilan birgalikda bog‘ hududini obodonlashtirish bo‘yicha kompleks ishlarni amalga oshirdi. Shanbalik ishtirokchilari yashil maydonlarni parvarish qilish, jamoat joylarini tozalash va qulay muhit yaratishga alohida e’tibor qaratdilar. Qo‘yilgan mehnat mintaqadagi ekologik vaziyatni yaxshilash va yashil hududlar maydonini ko‘paytirishga amaliy hissa bo‘lib qo‘shildi.

Bunday tashabbuslarda ishtirok etish Uzbekistan Airways korporativ ijtimoiy mas’uliyatining ajralmas qismidir. Aviakompaniya doimiy ravishda davlat ko‘kalamzorlashtirish dasturlarini qo‘llab-quvvatlab, barqaror rivojlanish, atrof-muhitni muhofaza qilish va atrof-muhitga ehtiyotkorona munosabatda bo‘lish tamoyillariga sodiqligini namoyish etmoqda.