Uzbekistan Airways xodimlari ISO kursi bo‘yicha malaka oshirdi

2025-yil 1–4-iyul kunlari Toshkent shahridagi CERT Academy xalqaro o‘quv markazida “Uzbekistan Airways” AJ xodimlari uchun “ISO 37001:2025 – Korruptsiyaga qarshi boshqaruv tizimi menejeri / Ichki auditori” maxsus dasturi bo‘yicha korporativ o‘quv kursi bo‘lib o‘tdi.

Mazkur trening kompaniyaning ISO 37001:2016 xalqaro sertifikatiga erishish va samarali antikorruptsiya menejment tizimini joriy etish yo‘lidagi bosqichma-bosqich ishlarining davomi sifatida tashkil etildi.

Korruptsiyaga qarshi mexanizmlarni takomillashtirish va mustahkam komplaens tizimini shakllantirish — “Uzbekistan Airways” AJning strategik ustuvor yo‘nalishlaridan biridir. Trening kompaniya ichki jarayonlarida ochiqlik va halollik standartlarini joriy etishga doir faol ishlarning mantiqiy davomiga aylandi.

Treningda bosh ofis hamda filiallar, jumladan:

• “Uzbekistan Airways Technics”
• “Uzbekistan Airways Sales”
• “Ketring”
• “O‘quv-trening markazi”
• “Helicopters”

shuningdek, quyidagi bo‘limlarning mutaxassislari ishtirok etdi:

• Kadrlar bo‘limi
• Yuridik boshqarma
• Jamoatchilik bilan aloqalar bo‘limi
• Moliya departamenti
• Xaridlar departamenti va boshqa korporativ nazorat tizimi ishtirokchilari

Treningni TÜV International Certification (Germaniya) va CERT International (Slovakiya) tashkilotlarining xalqaro auditori, antikorruptsiya sohasida tajribali mutaxassis Ildar Ineleev olib bordi. U IRCA (Buyuk Britaniya) dasturi bo‘yicha xalqaro tayyorgarlikdan o‘tgan va yuridik ma’lumotga ega.
 

O‘quv dasturi qatnashchilarga nazariy bilimlar bilan birga amaliy vositalarni ham taqdim etdi — bu esa ISO 37001 tizimini aviakompaniya tuzilmasida bosqichma-bosqich joriy etish imkonini beradi.

“Uzbekistan Airways” AJ kelgusida ham quyidagi yo‘nalishlarda tizimli faoliyatni davom ettiradi:

• antikorruptsiya siyosatini amalda joriy etish;
• yagona komplains tizimini shakllantirish;
• ISO 37001:2016 standarti bo‘yicha tashqi sertifikatsiyaga tayyorgarlik.

Trening yakunida ishtirokchilar test sinovidan o‘tadilar va ISO 37001:2025 tizimi bo‘yicha menejerlar va ichki auditorlar sifatida xalqaro namunadagi sertifikatlar bilan taqdirlanadilar.

Bu seminar — kompaniyada korporativ madaniyatni oshirish, korruptsion xatarlarni kamaytirish va xalqaro obro‘-e’tiborni mustahkamlash yo‘lidagi muhim qadam bo‘ldi.